Presidenti i Turqisë, Recep Tayyip Erdogan, ka deklaruar publikisht mbështetjen e tij për Iranin, duke thënë se Teherani ka një të drejtë “të natyrshme, legjitime dhe të ligjshme” për t’u mbrojtur përballë sulmeve të vazhdueshme të Izraelit ndaj objektivave ushtarake dhe bërthamore të tij.
Deklarata e fortë e Presidentit Erdogan vjen në ditën e gjashtë të luftimeve të ashpra midis Izraelit dhe Iranit, duke theksuar polarizimin e thellë të qëndrimeve në rajon.
“Është një e drejtë shumë e natyrshme, legjitime dhe ligjore për Iranin që të mbrohet nga banditizmi dhe terrorizmi shtetëror i Izraelit,” u shpreh Erdogan, duke shtuar një ditë pas komenteve të tij të mëparshme ku e cilësoi Kryeministrin izraelit Benjamin Netanyahu si “kërcënimin më të madh për sigurinë e rajonit”.
Presidenti turk shkoi edhe më tej në kritikat e tij ndaj Netanyahut, duke deklaruar se ai i ka tejkaluar krimet e Adolf Hitlerit në Gaza. “Shpresojmë që fatet e tyre të mos jenë të njëjta,” shtoi Erdogan, duke shkaktuar reagime të ndryshme ndërkombëtare për këtë krahasim të ashpër.
Erdogan u zotua se Turqia do të vazhdojë përpjekjet e saj diplomatike për t’i dhënë fund agresionit izraelit në rajon. “Po bëjmë gjithçka që mundemi për të ndaluar agresionin çnjerëzor të Izraelit kundër Gazës, Sirisë, Libanit, Jemenit dhe fqinjit tonë Iranit,” tha ai gjatë një fjalimi të mbajtur në grupin parlamentar të partisë së tij AKP në Ankara....
Presidenti turk paralajmëroi gjithashtu për pasojat e mundshme rajonale të këtij konflikti dhe siguroi se institucionet turke janë në gatishmëri të plotë për të përballuar çdo zhvillim të ri që mund të prekë Turqinë.
Në lidhje me bilancin e konfliktit deri më tani, mediat iraniane raportojnë se numri i të vdekurve nga sulmet ajrore izraelite ka arritur në 585, ndërsa mbi 1,300 persona janë plagosur. Si kundërpërgjigje, Irani lëshoi raketa balistike drejt Izraelit, duke shkaktuar 24 viktima dhe më shumë se 500 të plagosur, sipas raportimeve të ndryshme. Izraeli e nisi ofensivën e tij më 13 qershor, duke synuar objektet bërthamore dhe komandat ushtarake në disa qytete të Iranit.
Gjatë fjalimit të tij, Erdogan trajtoi edhe nismën “Turqia pa terror”, të iniciuar nga aleati i qeverisë, Devlet Bahçeli, me synimin e çarmatimit të plotë të PKK-së. Ai përmendi zhvillimet e fundit, përfshirë shpërbërjen e PKK-së pas vizitave të ligjvënësve të Partisë DEM tek udhëheqësi i saj i burgosur, Abdullah Öcalan.
Në fund, Presidenti turk nuk nguroi të kritikonte Partinë Republikane Popullore (CHP), opozitën kryesore në vend, duke e akuzuar për korrupsion në bashkitë që ajo drejton. Në veçanti, në shënjestër të kritikave ishte Kryebashkiaku i Stambollit, Ekrem Imamoğlu, i cili aktualisht ndodhet në arrest nën akuza për drejtimin e një rrjeti kriminal, ryshfete dhe manipulim tenderash. Sipas prokurorisë së Stambollit, dhjetëra persona janë arrestuar si pjesë e hetimeve ndaj bashkisë së Stambollit, dhe dëshmitë e para sugjerojnë se skema korruptive ka nisur që nga marrja e detyrës nga Imamoğlu në vitin 2019!